لویدیځ هېوادونه باید په ایران کې د بشري حقونو مسلې ته هم پاملرنه وکړي
په ایران کې د بشري حقونو مدافع او د سولې د جایزې ګټونکې شیرین عبادي وايي، د تهران د اتومي پروګرام په اړه شته اندېښنو په ایران کې د بشري حقونو د وضعیت د څرنګوالي په اړه د لویدیځ دولتونو سترګې پټي کړې دي.
میرمن عبادي د دوشنبې په ورځ په پاریس کې خبري کنفرانس ته وویل، چې د ایران پر اتومي پروګرام د نړېوالو زیات تمرکز په دې هېواد کې د بشري حقونو پر تخطیو پرده غوړولې ده.
شیرین عبادي، په ۲۰۰۳ کال کې په خپل هېواد کې د بشري حقونو د اعادې لپاره د خپلو فعالیتونو په خاطر د نوبل نړېواله جایزه واخیسته.
دې پرون په پاریس کې خبریالانو ته وویل، چې ایران په اوس مهال کې په دوه برخو پر بشري حقونو د تېري ډير خواشینونکې ریکارډ ټینګ کړې دې چې هغه یو د ژورنالیستانو زنداني کول او دوهم د کم عمره کسانو اعدام دې.
د ژورنالیستانو د حقونو د ملاتړ یوې ادارې په خپل وروستي رپوټ کې ویلي، چې که د ټولې نړۍ په سطحه وکتل شي د ژورنالیستانو له درېو یوه برخه په ایران کې د حکومت په توقیف کې دي.