چارواکي وايي افغانستان کې د کرنې د ودې لپاره ۵ ملیارده ډالرو ته اړتیا ده

په كابل كې په لسګونه بڼوالو او د كرنې اړوندو خيريه موسسو چارواكي د افغانستان د كرنې وزارت له خوا په جوړشوي دوه ورځني وركشاپ كې سره راټول شوي، چې په هېواد كې د متوازنې بڼوالۍ د ودې په اړه بحث وكړي.

د كرنې او مالدارۍ وزارت مرستيال غلام مصطفي جواد خبريالانو ته وويل، چې په دې وروستيو كلونوكې د هېواد په بېلابېلو ولايتونو كې بڼوالۍ پراختيا موندلې، په ځانګړي توګه د هغو مېوو، چې ونې يې د ډيرو كلونو لپاره حاصل وركولاى شي.

ښاغلي جواد همدا راز وويل، دوی په هېواد كې د متوازن زراعت لپاره د طبعي زيرمو د تنظيم، د حاصلاتو د جګوالي عوامل، په كوردننه او بهر كې د تازه ميو لپاره د ماركيټ موندلو په لټه كې دي.

جواد زیاتوي، چې په دې برخو كې د خپلو بېلابېلو پروګرامونو د تطبيق مرستې ته اړتيا لري.

په دغه وركشاپ كې يو بڼوال ازادۍ راډيو ته وويل، چې دوی په افغانستان كې د خپلو تازه مېو د ساتلو او بهر ته د انتقالولو اسانتياوي نه لري.

د كرنې وزارت مرستيال د بڼوالانو پر وړاندې د تازه ميو د پروسس د ميو د زخيره ځايونو او د ماركيټ ستونزې مني خو وايي، چې دوی هڅه كوي په نږدې راتلونكي كې د برزګرانو او بڼوالانو پر وړاندې پرتې ستونزې هوارې كړي.

د چارو كارپوهان وايي، سره له دې چې افغانستان يو كرنيز هېواد دى، خو په تېرو څو كلونو كې د نړېوالو ټولنې او افغان دولت له خوا د دغې برخې پراختيا لږه پاملرنه شوې.

خو د افغانستان د كرنې وزارت چارواكي وايي، چې نړېواله ټولنه په افغانستان د كرنې د سكټور په اهميت پوه شوې او په راتلونكي كې يې په دې برخه كې د مرستو ژمنې كړې دي.