نن سهار د زابل په ارغنداب ولسوالۍ کې د اختر محمد منصور پورې اړوند وسلهوالو هغه ۸ وسلهوال کسان اعدام کړي چې تېره ورځ يې له ۷ تنو افغانانو څخه سرونه پرې کړي وو.
ویل کېږي چې دغه اعدام شوي کسان د داعش وسلهوالو سره تړاو لري.
د زابل د ارغنداب ولسوال مهمند حسرتيار وايي؛ تېره شپه شپږ بجې د اکرم په نوم د داعش يو قوماندان له خپلو ملګرو سره د اختر محمد منصور له ډلې سره يو ځای شو.
د حسرتيار په خبره، د اکرم په ډله کې هغه ۸ تنه وسلهوال شامل وو چې تېره ورځ يې له ۷ تنو هزاره افغانانو څخه سرونه پرې کړي وو.
هغه زیاتوي د اختر محمد منصور ډلې دغه ۸ کسه نن سهار اته بجې د ارغنداب ولسوالۍ د "ښولاند" په سيمه کې اعدام کړي دي.
دغه راز ښاغلي حسرتیار څرګنده کړه؛ د ارغنداب ولسوالۍ ځينې سيمې چې مخکې د داعش تر ګنټرول لاندې وې؛ اوس د اختر محمد منصور ډلې نيولې دي.
د راپورونو پر بنسټ د داعش ډلې لهخوا اووه تنه وژل شوي؛ افغانان چې ۴۰ ورځې مخکې په غزني ولایت کې تښتول شوي وو؛ مړي یې تېره ورځ په زابل کې د پولیسو لهخوا وموندل شول.
چارواکي وايي چې په دغو وژل شویو کسانو کې درې ښځې او څلور نارینه شامل دي چې په ډېرې بې رحمۍ سره وژل شوي وو.
راپور: محمد صادق رښتینی