د افغانستان کرکټ بورډ ادارې په یوه تازه اعلان کې ویلي دي چې پخوانی لوبغاړی احمدشاه سلېمان خېل یې د غوراوي کمېټې سرپرست مشر ټاکلی دی.
وروسته له هغې چې د ۱۹ کلنو ځوانانو په نړیوال جام کې افغان لوبډلې خپلې ټولې سیالۍ وبایللې، د غوراوي کمېټې مشر اسدالله خان ازادي راډیو ته وویل چې یاده لوبډله د ده لخوا نه وه انتخاب شوې.
نوموړي دغه راز دا هم ویلي و چې د دندې له پیل څخه یې د افغانستان د شل اوریزو سیالیو لوبډله نه ده غوره کړې.
کرکټ بورډ د یکشنبې په ورځ ( د جنورۍ په ۲۸مه) پر خپلو ټولنیزو پاڼو ولیکل:
" د ملي لوبډلې پخوانی لوبغاړی احمد شاه سلېمانخېل د افغانستان کرکټ بورډ د لوبغاړو د غوراوي کمېټې د سرپرست مسوول په توګه وټاکل شو. احمدشاه سلېمانخېل د ملي لوبغاړي ترڅنګ له دې وړاندې د غوراوي کمېټې د مشر، د کورني کرکټ د عمومي مسوول, د ظرفیت لوړونې مرکز او نړيوال کرکټ څانګو د غړي په توګه هم دندې ترسره کړې دي."
د ویلو ده چې د ښاغلي سلېمانخېل دنده به د سریلانکا پر وړاندې راتلونکې لوبلړیو ته د ټيسټ، یو ورځنیو او شل اوریزو سیاليو لپاره د لوبډلو له ټاکلو پيليږي.