د طالبانو یوې مخالفې ډلې، په کابل کې تېر ماښام د طالبانو د څلورو پوځیانو د وژلو ادعا کړې ده.

د افغانستان د ازادۍ جبهې په خپله ایکس شبکه کې لیکلي، په دې حمله کې چې د کابل په قوای مرکز کې د طالبانو پر پوسته پر راټولو شویو طالبانو شوې، د طالبانو دوه نور غړي ټپیان شوي هم دي.

طالبانو د دې ادعا په باب کومه تبصره نه ده کړې.

ازادي راډیو نه شي کولی چې دغه ادعا په بې پرې ډل تایید کړي.

له پولیو د پاک افغانستان ادارې اعلان کړی چې له نن (دوشنبې) د افغانستان په ټولو ولایتونو کې د ګوزڼ د مخنیوي لپاره د ماشومانو واکسیناسیون پیلوي.

دې ادارې په یوه خبرپاڼه کې، ویلي چې د واکسین ترڅنګ به ماشومانو ته ویټامین اې (A) هم ورکړل شي.

د پولیو فري افغانستان یا له پولیو څخه د پاک افغانستان ادارې، ویټامین اې (A) د ناروغیو په وړاندې د ماشومانو د مقاومت د لوړېدو لپاره ګټور بللي دي.

افغانستان او پاکستان لا هم په نړۍ کې یوازیني دوه هیوادونه دي چې د پولیو ناروغي پکې محوه شوې نه ده.

سږکال افغانستان کې د پولیو دوه مثبتې پېښې ثبت شوې دي.

د افغانستان د خبریالانو مرکز په خوست کې د نیول شویو درېيو خبریالانو د خوشې کېدو خبر ورکوي.

دغه مرکز چې اوس له افغانستانه بهر فعالیت کوي، نن یکشنبې په خپله وېب پاڼه کې په یوه بیان کې ویلي چې د راډیوګانو دغه درې خبریالان چې د موسیقۍ د خپریدو او له ښځینه اوریدونکو سره د ټیلفوني تماسونو په تور نیول شوي وو، له شپږ ورځو توقیف وروسته نن یکشنبې غرمه مهال د خوست د امنیې قومندانۍ له توقیفه خوشې شول.

د افغانستان د خبریالانو مرکز د ناز راډيو د خبریال اسماعیل سعادت، د اقراء راډیو د خبریال وحیدالله معصوم او د ولس غږ راډیو د خبریال احسانه الله تسل د خوشې کېدو هرکلی کړی، خو ټینګار یې کړی چې د دوی نیول کیدل غیرقانوني وو او باید نیول شوي نه وای.

د افغانستان د خبریالانو مرکز ویلي، پر افغانستان د طالبانو له بیا واکمنیدو راهیسې په ټول هېواد کې د رسنیو له خوا د موسیقي پر خپریدو بندیزلګول شوی و، خو له رسنیو سره د ښځنیه اوریدونکو پر ټیلفوني تماسونو بندیز یوه نوې موضوع ده چې د تېرکال په حوت میاشت کې په خوست کې د طالبانو امنیه قومندانۍ عملي کړې ده.

د ملګرو ملتونو د ماشومانو د ملاتړ اداره، یونسیف وايي، په افغانستان کې تر ۱۲ میلیونه ډېر ماشومان بشري مرستو ته اړتیا لري.

د دې ادارې د مارچ میاشتې په راپور کې، چې پرون (شنبې) خپور شو، ویل شوي چې اقتصادي ځوړتیا، د بې روزګارۍ زیاتېدا، د اوږدو جګړو او اقلیمي بدلون اغېزې په افغانستان کې د بېوزلۍ د ډېرېدو اصلي عوامل دي.

یونسیف وايي، افغان ماشومانو ته د مرستې لپاره یو میلیارد او ۴۰۰ میلیون ډالرو ته اړتیا ده ،خو تراوسه د دې پیسو یوازې ۳۵ سلنه برابرې شوې دي.

د پاکستان د سناجرګې رييس یوسف رضا ګیلاني وايي، هېواد یې د ترهګرۍ له ستونزې سره مخامخ دی او باید دا ستونزه له طالبانو سره د خبرو له لارې حل شي.

د پاکستاني رسنیو د راپور له مخې، ګیلاني پرون په یوه غونډه کې وویل، د امنیت د ټینګېدو لپاره باید د طالبانو له حکومت سره خبرې وشي او د ترهګرۍ ستونزه له دې لارې هواره شي.

پاکستان تور پورې کوي چې طالبانو د ټي ټي پي غړیو ته پناه ورکړې، خو طالبان د پاکستان تور ردوي او وايي چې پاکستان دې خپلې ستونزې په خپله خاوره کې حل کړي.

د طالبانو د اوبو او انرژۍ وزارت وايي چې د وروستیو ورښتونو له کبله له ډېرو کلونو وروسته په لومړي وار د قرغې بند له اوبو ډک شوی دی.

دغه وزارت نن پر خپله ایکسپاڼه لیکلي چې د بند له ډکېدو وروسته د هغه پرچاوه فعاله شوې ده.

د وروستیو ورښتونو له کبله، چې په نتیجه کې یې ډېر سیلونه هم وبهېدل، د دې ترڅنګ چې د سر و مال تاوانونه پېښ شول د افغانستان اکثره بندونه له اوبو ډک شوي دي.

د طالبانو مخالفه وسلواله ډله، د افغانستان د مقاومت ملي جبهه ادعا کوي چې په کابل او هرات کې یې څلور طالبان وژلي دي.

دغې جبهې په یوه خبرپاڼه کې ادعا کړې چې تېر ماښام یې د کابل د چهاردهي سیمې پر سړک پر دوو موټرسایکلو سپرو طالبانو حمله کړې او دواړه یې وژلي دي.

دغې جبهې په جلا خبرپاڼه کې ویلي چې په بله حمله کې یې پرون سهار په هرات کې د کډوالو چارو ریاست مخې ته د طالبانو د سرحدي لوا دوه پوځیان وژلي دي.

طالبانو په دې باب څه نه دي ویلي، خو دغه ادعاګانې د خپلواکو سرچینو له هم تایید شوې نه دي.

د طالبانو د ټرانسپورټ او هوايي چلن وزارت د هواپېژندنې ریاست اټکل ښيي چې نن یکشنبه به هم د افغانستان په ۲۸ ولایتونو کې اورښتونه او سېلابونه وي.

دغه وزارت پرون شنبه په خپله ایکس شبکه (پخواني ټویټر) کې لیکلي، په بدخشان، تخار، کندوز، بلخ، سمنگان، نورستان، کونړ، لغمان، ننگرهار، پروان، پنجشېر، کاپیسا، کابل، بغلان، میدان وردګ، لوگر، پکتیا، پکتیکا، خوست، غزني، ډایکنډي، بامیان، سرپل، زابل، اروزگان، کندهار، هلمند او غور ولایتونو کې د اورښتونو، تالندې- برېښنا او سېلابونو احتمال شته.

په بېلابېلو سیمو کې د باران اندازه له ۱۵ تر ۵۰ ملي مترو اټکل شوې ده.

په دوام کې ویل شوي چې په ځینو ولایتونو کې د سختو بادونو د لګېدو احتمال هم شته.

په وروستیو اوونیو کې د اورښتونو او سېلابونو له کبله په لسګونو کسان مړه شوي او زرګونو کورونو یا کروندو ته یا څه ناڅه زیان اوښتی یا په بشپړ ډول ویجاړ شوي دي.

په کابل کې نن د سړک جوړولو د درېیو پروژو چارې پیل شوې.

په دې پروژو کې یوه د خیرخانې مینې کوتل سړک د دویم لاټ جوړول دي چې څه باندې دوه نیم کیلومتره اوږدوالی او شپېته متره عرض لري.

دوهمه پروژه د کابل له قصبې سیمې د شهید تر چوک پورې د سړک جوړول دي چې نژدې دوه کیلومتره اوږدوالی لري او درېیمه پروژه د کابل له نړیوال هوایي ډګر څخه تر ګمرک پورې د سړک د جوړېدو ده.

د طالبانو د ریاست الوزرا د اقتصادي مرستیال ملا عبدالغني برادر په شمول یو شمېر چارواکو نن د دې پروژو د پرانیستلو په مراسمو کې برخه واخیسته.

د طالبانو تر واک لاندې د باختر اژانس د خبر له مخې دا درې سره پروژې به د ښاروالي له بودیجې څخه د شاوخوا نهه سوه پنځوس میلیونه افغانیو په لګښت د څه باندې یونیم کال په ترڅ کې ګټې اخیستنې ته وسپارل شي.

د بخښنې نړیوال سازمان د طالبانو له حکومته غوښتې چې د خوست درې خبریالان پرته له څه قید او شرطه خوشې کړي.

دې سازمان د جمعې په ورځ په ایکسپاڼه کې په دې اړه اندېښنه وښوده.

خبریالان اسماعیل سعادت، وحیدالله معصوم او احسان‌الله تسل د موسیقي د خپرېدو او له ښځینه اورېدونکو سره د خپرونې پر مهال د خبرو له امله د اپرېل په ۲۲مه توقیف شول.

د امر بالمعروف او نهی عن المنکر ریاست رسنیو ته په استولي پيغام کې ویلي چې دا کسان د دوی د حکومت له قوانینو څخه د سرغړونې له امله محکمې ته معرفي شوي دي.

تر دې مخکې د خبریالانو د خوندیتوب کمېټې او د بې پولي خبریالانو سازمان د دې خبریالانو د سمدستي خوشې کېدو غوښتنه کړې وه.